“Тылбаас суолунан”: Үөһээ-Бүлүү 4 № Испирдиэнэп аатынан орто оскуола үөрэнээччилэрин проега. Үөһээ-Бүлүү, 2017с.
Худуоһунньуктар: Ефремова Виолетта, Ильина Вероника, Иванова Надя, Христофорова Ивалина, Дмитриева Санаайа, Корякина Милена.
Уус-уран литератураҕа тылбаас суолтата сүҥкэн улахан: атын омук култууратын өйдөөһүн эрэ буолбакка — иҥэрээһин, бэйэ тылын, литературатын сайыннарыы буолар. Бу проекка — оҕолор Ааҥгылыйа тылыттан сирэй тылбаастааһыҥҥа сэмэй холонуулара киирдэ.
Тылбаас суола — сайдыы суола
“Киһи киһиттэн үөрэнэр” диэн этэр саха өһүн хоһооно. Ол курдук омук омуктан үөрэнэр,атыннык эттэххэ, тылбааһа суох саҥаны билии-көрүү, сайдыы барбат.
Уус-уран литератураҕа тылбаас суолтата сүҥкэн улахан: атын омук култууратын өйдөөһүн эрэ буолбакка — иҥэрээһин, бэйэ тылын, литературатын сайыннарыы буолар. Ону биһиги нуучча тылын эбэтэр англия тылын холобурдарыгар көрүөхпүтүн сөп. Нууччалар Арҕаа Европа омуктарын айымньыларын, былыргы Гомертан саҕалаан, өлгөмнүк тылбаастаабыттарын түмүгэр 19-с үйэтээҕи нуучча улуу литературата үүнэн-сайдан тахсыбыт. “Англия, Германия, Франция суруйааччыларын айымньыларын тылбааһа суох “Пушкин” диэн историяҕа улуу аат суох буолуо этэ” диэн анал үөрэхтээхтэр билинэллэр.
Оттон Англия тылын саппааһа 16-17-с үйэлэргэ икки төгүл улааппытын (200.000 лэксиэмэттэн 400.000-ҕа тиийбитин) төрүөтэ – Шекспир курдук олус элбэх тылбаасчыт дьон араас омук айымньыларын тылбаастыырга күргүөмүнэн түһүммүттэригэр сытар.
Уус-уран айымньы тылбааһа “интерпретация” диэн ааттанар (“Интерпретация основана на принципиальной многозначности художественного образа и является истолкованием смысла произведения в определенной культурно-исторической ситуации его прочтения.” Новейший словарь иностранных слов и выражений – “издательство АСТ” 2001). Итинтэн көстөрүнэн, биир айымньыны араас омук (ол иһигэр араас ааптар) история араас кэрдииһигэр көрүүтэ, сыаналааһына, тылбаастааһына тус-туспа буолар. Өскөтүн Шекспиры нуучча ааптара тылбаастаабытын саха тылыгар тылбаастыыр эбит буоллахпытына, ол аата Шекспиры буолбакка, нуучча интерпретациятын интерпретациялааһын буолан тахсар. Онон, омук айымньытын сирэй тылбаастааһын (оригиналтан) дьиҥнээх тылбаас, дьиҥнээх интерпретация буолара чуолкай.
Бу проект — оҕолор Ааҥгылыйа тылыттан сирэй тылбаастааһыҥҥа сэмэй холонуулара. Кинилэргэ истиҥ эҕэрдэбитин, үтүө алгыспытын ыытыаххайыҥ, төрөөбүт тылбыт, литературабыт сайдар суолугар кинилэргэ инникитин өрүү ситиһиини баҕарыаҕыҥ!
Үүнүү-сайдыы сирэлийэ, байыы-тайыы үксүү туруохтун!
Е. Ф. Васильева
